३ चैत्र, नेपालगन्ज । बाँके निर्वाचन क्षेत्र नं. २ बाट नवनिर्वाचित प्रतिनिधिसभा सदस्य मोहम्मद ईस्तियाक राईको पहलमा मालपोत कार्यालय, बाँकेमा नागरिक हेल्प डेस्क स्थापना गरिएको छ ।
निर्वाचनको प्रचार प्रसारका क्रममा उनले १५ दिनभित्र हेल्प डेस्क स्थापना गरी निःशुल्क रूपमा जग्गाधनी प्रमाणपुर्जाको श्रेस्ता कायम गराउने घोषणा गरेका थिए । सोही बमोजिम मोहम्मद ईस्तियाक राईको पहल र सहयोग तथा लुम्बिनी प्रदेश सरकार, नेपालगन्ज उपमहानगरपालिका र मालपोत कार्यालयको समन्वयमा मालपोत कार्यालय, बाँकेमा नागरिक हेल्प डेस्क स्थापना गरिएको हो ।
सो डेस्कबाट विपन्न र गरिबले निःशुल्क श्रेस्ता कायम लगायतका सेवा पाउनेछन् ।
उद्घाटनका क्रममा प्रतिनिधिसभा सदस्य राईले हाल जनशक्ति अभाव रहेकाले आर्थिक रूपमा कमजोर नागरिकलाई प्राथमिकतामा राखेर सेवा लिन आग्रह गरेका छन् ।
उनले भने, ‘अहिले जनशक्ति कम भएकाले लेखापढीमा पैसा तिर्न नसक्ने नागरिकले हेल्प डेस्कबाट सेवा लिनुहोस् । छिट्टै जनशक्ति थपेर सबै सेवाग्राहीलाई समेट्ने प्रयास गर्छौं ।’
हेल्प डेस्क उद्घाटन कार्यक्रममा प्रदेशका आन्तरिक मामिला मन्त्री आदेश अग्रवाल, नेपालगन्ज उपमहानगरपालिकाका मेयर प्रशान्त विष्ट तथा मालपोत कार्यालयका प्रमुख सविनसिंह चौधरीलगायतको उपस्थिति रहेको थियो ।
